दोलखा, २८ भदौ ।
  १२ वैशाखमा आएको भूकम्प र त्यसपछिका शक्तिशाली पराकमपनका कारण बन्द रहेको माथिल्लो तामाकोसी जलविद्युत् आयोजनाको प्रसारण लाइन निर्माण कार्य पुनः सुरु भएको छ ।

भूकम्पका कारण निर्माण कार्य बन्द भएको थियो । लट–४ का भारतीय ठेकेदार कम्पनी केइसी इन्टरनेशनल लिमिटेडले आयोजना निर्माण कार्यलाई पुनः सुरु गरेको छ । आयोजनाले केन्द्रीय ग्रीडमा २२०-१३२ केभी प्रसारण लाइनमार्फत विद्युत् जोड्ने लक्ष्य लिएको थियो ।

तीन गाविसमा सात वटा टावरको निर्माण गर्ने कार्य पुनः सुरु गरिएको माथिल्लो तामाकोसी जलविद्युत् आयोजनाका प्रवक्ता डा. गणेश न्यौपानेले बताए । उनका अनुसार लादुक र लामिडाँडा गाविसमा छ वटा टावरको पिट मार्किङ, लेभलिङ र स्काभेसन सुरु भएको छ भने जफे गाविसको एउटा टावर निर्माणको लागि स्टिल फेब्रिकेसन ढुवानी सुरु भएको छ । न्यौपानेले आवादी जमिन भएको स्थानमा काम सुरु गरिएको र सामुदायिक वन क्षेत्रमा परेका ५५ टावर निर्माणको लागि वन मन्त्रालयको स्वीकृतको लागि अन्तिम अवस्थामा रहेको बताए ।

सम्पूर्ण तयारी सकिएकाले असोज १ देखि आयोजनाको पावर हाउसको काम र बाँधस्थल पुग्ने प्रवेश मार्गको मर्मत सुरु गरिने उनले जानकारी दिए । आयोजनाको लट–४ अन्तर्गत करिब २८ वटा टावरको काम सुरु गरिएकोमा १३ टावरको निर्माण सम्पन्न भइसकेको आयोजनाले जनाएको छ । केइसीका किरातीछाप स्टोर इन्चार्ज केएस सरकारले टावरको स्टिल पाता, डिस, रिङसमेत निर्माणस्थलमा ढुवानी भइरहेको जानकारी दिए ।

आयोजनाको लट–४अन्र्तगत पर्ने प्रसारण लाइनको सम्झौताअनुसार २०७२ असार मसान्तसम्म निर्माण सक्नुपर्नेमा एक वर्ष ढिला सुरु भएको थियो । प्रसारण लाइनका लागि केइसीले १ करोड ७९ लाख ४ हजार ८ सय ७२ अमेरिकी डलर तथा २५ करोड २५ लाख ५९ हजार ५ सय २० रुपैयाँ गरी दुई मूल्यमा निर्माण सम्झौता गरेको थियो । नेप्लिज डट ओआरजीबाट