दोलखा, १९ कात्तिक । 

दोलखा जिल्लाको गैरीमुदी गाविस ६ का स्थानीय खानेपानीको चरम समस्यामा परेका छन् । भूकम्प गएपश्चात पानीको मुहान सुकेपछि अहिले उनीहरु खानेपानीको समस्यामा परेका हुन् । यसअघि २०५६-५७ सालमा पाइपमार्फत पानी ल्याइएको भएपनि भुकम्पपछि पानीको मुहान सुकेका कारण समस्या भएको हो ।

अहिले स्थानीयले घण्टौसम्म हिडेर  ढुङगेधाराबाट पानी ल्याउन बाध्य छन् । पानीको मुहान पनि सुक्यो, अन्य स्रोत पनि छैन खानेपानीको धेरै समस्या भएको एक स्थानीयको गुनासो छ ।

दलित र जनजाति समुदायको बाहुल्यता रहेको सो स्थानका नागरिक  डोको नाम्लो लगाएर कुवाको पानी ल्याएर खान बाध्य भएका छन् । विगत ५ महिनादेखि खानेपानीको समस्या भोगिरहेका उनीहरुले पानीको सुविधाका लागी पहल गरिदिन सम्बन्धित निकायसगँ आग्रह गरेका छन् ।