दोलखा, २८ माघ । 

एक गाविस सचिव महिनामा ५ गाविस सरुवा भएका छन् । सामान्यतया वर्षमा एक पटक सरुवा गर्ने प्रचलन भए तापनि दोलखाका एक जना गाविस सचिव एक महिनाभित्र ५ वटा गाविसमा सरुवा भएका छन् ।

जिल्ला विकास समितिको कार्यालय दोलखाले पटक पटक गाविस सचिव सरुवाको पत्र दिएपछि दोलखाको लामाबगर गाविसमा अहिले २ जनाले गाविसको सचिवको रुपमा काम गर्दै आएका छन् । गाविस सचिवको अभावमा एक सचिवले २ देखि ५ वटासम्म गाविसको जिम्मेवारी लिनुपर्ने अवस्थामा लामाबगरमा भने २ जना सचिव पुगेका छन् ।

२ वर्षदेखि लामाबगरमा कार्यरत भरत पौडेललाई जिविसले अन्यत्र सरुवा गरे तापनि उनले रमना लिन मानेका छैनन् । अर्का सचिव तेजप्रसाद धमलाले पनि एक महिनादेखि लामाबगरको काम काज गर्दै आएका छन् । पौडेल एक वर्षअघि सुब्बामा बढुवा भएपछि खरिदारको दरबन्दी रहेको लामाबगरमा अर्का सचिवको सरुवा गरेको जिविस स्रोतले जानकारी दिएको छ ।

जिविसले एक महिनामा पौडेललाई ५ गाविसमा ३ पटक सरुवा गरिसकेको छ । गत मंसिर १५ गते पौडेललाई लामाबगरबाट बोच र लाँकुरीडाँडा गाविसको जिम्मेवारी सहित सरुवाको पत्र दियो । पुस ९ गते पुनः जुँगू र क्षेत्रपा सरुवा गरी जुँगू र क्षेत्रपाका तेज धमलालाई लामाबगर सरुवा ग¥यो । पुस १७ गते पुनः सुनखानी र लाकुरीडाँडा सरुवा भएको पत्र दियो । त्यसको २ दिनपछि पुस १९ मा सुनखानी मात्र भनेर मौखिक जानकारी गराएको पौडेलले बताए ।

‘मलाई लामाबगर छाडेन भन्ने आरोप छ’ उनले भने ‘म कुन गाविस गएर काम गर्ने ?, महिनामा ५ गाविसमा सरुवा गरेको भनेर ३ वटा पत्र दिएको छ ।’ ‘आफूले लामो समय काम गरेको गाविसबाट बरबुझारथ गएर सरुवा भएको ठाउँमा जाने मनस्थिति बनायो, पछि अर्कैमा सरुवा भनेर अर्को पत्र आउँछ’ उनले भने ।

निजामति कर्मचारीलाई महिनाभित्र पटक पटक सरुवा गर्ने अहिलेसम्म आफूलाई कुनै पनि कानुन बारे जानकारी नपाएकाले आफैं अन्यौलमा परेको दुःखेसो गरे । सबै सचिव भ्रमणमा गएका बेला १० दिनसम्म ५१ वटै गाविसको एकै पटक काम समेत गरेको बताउँदै उनले नयाँ ठाउँमा कति दिन न्यूनतम काम गर्ने हो अब तोकेर पत्र आए जुनसुकै ठाउँमा पनि आफू काम गर्न तयार रहेको बताए ।

पछिल्लो समय पौडेलले सुनखानी र लामाबगर दुवैको काम गर्दै आएका छन् । धेरै सचिवले २ वटाको काम गरेकाले जिविसलाई सचिव व्यवस्थापन गर्न सहज बनोस् भनेर आफूले अहिले २ गाविसकै काम गरेको बताए । सचिवहरु नहुँदा कुनै सचिवले सरकारी राहत नबाँड्दा समेत लामाबगर, ओराङ, बुलुङ र सुनखानीमा १० हजार राहत आफैंले वितरण गरेको उनले दाबी गरे ।

दोलखाकी स्थानीय विकास अधिकारी सीता परियारले मन्त्रालयबाट दरबन्दी अनुसारको कर्मचारी नपठाउँदा गाविस सचिवको व्यवस्थापनमा समस्या आएको जानकारी दिइन् । एक महिनाभित्र ५ ठाउँ सरुवा भएको नभएको दाबी गर्दै उनले भनिन् ‘कम कर्मचारी हुँदा जिविसले भएकाबाट आन्तरिक व्यवस्थापन गर्दा केही समस्या आए पनि समाधान भई सकेको छ ।’ उनले सरुवा भएको कर्मचारीले रमाना लिएर जानुपर्ने बताइन् ।

दोलखामा ४८ गाविस रहे तापनि अहिले ३३ जना सचिव कार्यरत छन् । दुर्गम भत्ता र बढुवामा दुर्गम नं. थपिने हुँदा लामाबगर र गौरीशंकर गाविस सबैको रोजाइको गाविसमा पर्छ । दुर्गम गाविस भए तापनि माथिल्लो तामाकोसी जलविद्युत आयोजनास्थल भएकाले केही वर्षयता लामाबगर राष्ट्रकै ध्यानमा परेकाले सुगम जत्तिकै सुविधा समेत छन् ।