दोलखाका भूकम्प पीडितलाई घर बनाउ कुहिएको बाँस सहयोग गर्दै प्लान नेपाल
दोलखा, ६ फागुन ।
प्लान नेपाल नामक आइएनजिओले दोलखाका विभिन्न गाविसमा कुहिएको बाँस वितरण गरीरहेको छ । भूकम्प पीडितहरुलाई जबरजस्ती राहत स्वरुप अस्थायी आवास निर्माणका लागि कुहिएको बाँस वितरण गरेको हो ।
अस्थायी आवास बनाउन असारमै वितरण गर्नु पर्ने बाँस दोलखाका भूकम्प पीडितहरुलाई जबरजस्ती वितरण गरेको छ । प्लानले बोच, मागापौवा, काटाकुटी, भुषाफेदा, ताम्चेत, दुधपोखरी, शैलुङ्गेश्वर, पवटी, डाँडाखर्क, घ्याङसुकाठोकर, भेड्पु र फस्कु गाविसमा कुहिएको बाँस र निगाला जबरजस्ती वितरण गरेको पीडितको भनाई छ । यी गाविसका ५ हजार परिवारलाई करिब ५ करोड ६० लाख रुपैयाँ बराबरको बाँस वितरण गरिने प्लान नेपालले जनाएको छ ।
अधिकांसले अस्थायी आवास बनाएको ७ महिना पछि प्लानले अस्थायी आवासको लागि भन्दै जबरजस्ती एक थान त्रिपाल र १२ ओटा बाँस भिडाएको डाँडाखर्क–७ का भुकम्प पीडित शम्भु केसीले जानकारी दिए । उनले भने, ‘बाँस पनि कुहिएको र बाँस भन्दै निगाला वितरण गरेर प्लानले जात्रा देखाएको छ ।’ बोचका पीडित नवराज थापाले भने, ‘सरकारले दिएकोबाट कटेरो बनाइयो, जबरजस्ती बना भन्छ, बनाउने ठाउँ छैन ।’ डाँडाखर्क र घ्याङसुकाठोकर गाविसले बाँस र त्रिपाल बहिष्कार गरेको छ भने बोच गाविसले सुकाएर दाउराको रुपमा प्रयोग गरेको पीडितहरुले जनाएका छन् ।
जिल्ला दैवी प्रकोप उद्धार समितिका संयोजक एवम् प्रमुख जिल्ला अधिकारी देवेन्द्र लामिछाने समितिको बैठकमा प्रश्न उठ्दा आवास नबनाई गोठ मात्र बनाए पनि हुने भनेर आश्वस्त पारेकोले अनुमति दिइएको जानकारी दिए । असार महिनामा युएसएड र डीएफआइडीसँग प्रस्तावपत्र पेश गरिएकोमा केही समयअघि मात्र स्वीकृत भएकोले जसरी पनि वितरण गर्नु पर्ने र अरु प्रस्ताव गुम्ने डरले जबरजस्ती भए पनि भिडाउनु पर्ने बाध्यता रहेको प्लान नेपालकै कर्मचारी स्वीकार गर्छन ।
प्लानले हिमशिखर ट्रेडर्स एण्ड सप्लायर्स उदयपुर र सन्तोष निर्माण सामग्री प्रालि चरिकोटबाट आवास र सरसफाई २ शीर्षकमा बाँसको खरिद र ढुवानी गराएको छ । बाह्य बजारबाट १ लाख २० हजार बाँस प्रतिगोटा २ सय ९२ रुपैयाँ र स्थानीयस्तरबाट ५ बाँस प्रतिगोटा ७५ रुपैयाँमा खरिद गरेको प्लान नेपाल दोलखाले जनाएको छ । प्लान नेपाल दोलखाका जिल्ला संयोजक चन्द्र कायस्थले मापदण्ड नपुगेको बाँस फिर्ता गरेर सप्लायर्सबाट असुल गरिने जानकारी दिए ।
0 comments
Write Down Your Responses
Note: Only a member of this blog may post a comment.