दोलखा, १९ माघ ।

नेपाली कांग्रेस दोलखाको १२ औँ अधिवेसन सकिएको ६ वर्ष वितिसक्दा समेत अधिवेसनको खर्च हालसम्म पनि नतिरेको होटल व्यवसायीहरुले जनाएका छन् । चरिकोटका होटल व्यवसायीहरुले काँग्रेस दोलखाका अधिवेसन प्रतिनिधिलाई अघिल्लो अधिवेसनको खर्च बक्यौता रहेको भन्दै बास दिएका छैनन् ।

लक्ष्मी लज चरिकोटका सञ्चालक सजल कार्कीले अघिल्लो अधिवेसनको खर्च नै नतिरेको भन्दै बास नदिने भन्दै फिर्ता पठाएको बताए । उनले भने, ‘यसपटक शर्तनामा सहित ५० प्रतिशत पेश्की दिएकाले ८ ओटा कोठामात्र दिएको छु । उनले थपे, संविधानसभाको निर्वाचनमा प्रयोग गरेको गाडीमा एमाले कार्यकर्ताले तोडफोड गर्दा क्षेत्र नं. १ का तत्कालीन उम्मेदवार जिपछिरिङ लामाले जिम्मेवारी समेत नलिएकोले कार्यकर्ता आक्रोसित भएका छन् ।

१२ औँ जिल्ला अधिवेसनमा गरिएको कूल खर्चमा करिब ५ लाख रुपैयाँ नतिरेको सम्वन्धित होटल व्यवसायीहरुले जनाएका छन् । अधिवेशन खर्च नतिर्नेहरुमा जनकपुर अञ्चलबाट केन्द्रीय सदस्यका उम्मेद्ववार घोषणा गरेका ताराबहादुर कोइराला, सभापतिका उम्मेद्ववारी घोषणा गरेका रुद्रबहादुर खड्का, सभापतिका अर्का उम्मेदवार बर्मा लामा, खुल्ला तर्फका केन्द्रीय सदस्यका उम्मेदवार जिपछिरिङ लामासम्मले कुनै न कुनै होटल व्यवसायीहरुका अधिवेशन खर्च नतिरेको होटल व्यवसायीहरुले जनाएका छन् ।
कांग्रेसले अधिवेसन खर्च नतिरेको कारण होटल डाँफे, सौगात होटल र नौलो विहानी विस्थापन नै हुनु परेको होटल व्यवसायीहरुको भनाइ रहेको छ । जिल्लाको दोस्रो ठूलो बजार जिरीमा गरिएको क्षेत्र नं। १ को १२ औं अधिवेसनको खर्च नतिरेको कारण यसपालिको क्षेत्र नंं १ को १३ औं अधिवेसन सदरमुकाम चरिकोटमा नै आयोजना हुने भएको छ ।