सुनखानी गाविसका ५५ परिवार भूकम्प पीडितलाई पौडेलको २० लाख सहयोग

दोलखा, २६ फागुन । रोजगारीको क्रममा स्विटजरल्याण्डमा बस्दै आएका एक युवकले भूकम्पपीडितका लागि नयाँ घर बनाउन २० लाख रुपैंया सहयोग रकम गरेका छन् । 

दोलखाको सुनखानी गाविस १, डाँडाथोकका २८ वर्षीय कुलप्रसाद पौडेलले जन्म थलोका ५५ जना भूकम्प पीडित परिवारलाई २० लाख रुपैयाँ र गाउँभरीका बिद्यालयमा पढ्ने निम्न आय भएका १ सय १७ जना बिद्यार्थीका लागि १ लाख १७ हजार रुपैयाँ रकम सहयोग गरेको छन् ।

उनले निम्न आय भएका ५५ भूकम्प पिडित परिवार र बालबालिकालाई गाउँ विकास समितिको सहयोगमा सो रकम हस्तान्तरण गरेका हुन् ।  वैशाखमा २९ गते केन्द्रबिन्दु परेको सुनखानीका ३८ विपन्न परिवार र छिमेकी सुन्द्रावतीका १७ परिवारलाई उनले नयाँ घर बनाउनका लागि उक्त रकम हस्तान्तरण गरेका कालिनाग उच्च मावि सुनखानीका शिक्षक मोहन पाठकले जानकारी दिए ।

कुलप्रसादले गाविस र स्थानिय संयन्त्रसँगको छलफलका आधारमा निम्न आय भएकाहरुलाई विपन्न मानी प्रति परिवार १० हजारदेखि २ लाख रुपैयाँसम्म रकम बाँडेका हुन् । उनले मंगलबार गाउँमै कार्यक्रम गरी सुन्द्रावती गाविसका थिरप्रसाद ओलीलाई सबैभन्दा बढी दुई लाख रुपैयाँ, सुनखानी गाविस ६ का धनमाया खरेललाई एक लाख ८० हजार, सुन्द्रावतीका लक्ष्मी उप्रेतीलाई डेढ लाख र सुन्द्रावतीकै संगीता पकुवाललाई एक लाख रुपैयाँ सहयोग हस्तान्तरण गरेका छन् ।

कुलप्रसादले ५१ जनालाई १० हजारदेखि ६० हजार रुपैयाँसम्म वितरण गरेका छन् । सर्वपक्षीय उपस्थितिमा २८ वर्षे युवकले भूकम्प पीडितहरुलाई राहत बाडिरहेको देखेर कतिपयका आँखा रसाएका थिए भने कतिपयले उनको कार्यको प्रशंसा गरिरहेका थिए ।

नागरिकबाट